Ulhasnagar : उल्हासनगरमधून एक हृदयद्रावक घटना समोर आली आहे, उल्हासनगरच्या शांतीनगर भागात राहणाऱ्या १२ वर्षीय मुलीची निर्घुण हत्या केल्याची घटना समोर आली. हत्यारा दुसरातिसरा कोणी नसून मृतक मुलीचा मोठा भाऊ असल्याचे समोर आले आहे. यानंतर पोलिसांनी या निर्दयी भावाला अटक केली.
मिळालेल्या माहितीनुसार, मृतक मुलगी ही तिचा मोठा भाऊ आणि वहिनीसोबत राहत होती. तिचे आई-वडील गावात राहतात. मुलीला काही दिवसांपूर्वी पहिल्यांदा मासिक पाळी आली. मात्र हे पाहून तिच्या वहिनीने तिच्या भावाला चुकीची सांगून तिच्याविषयी भडकवले. मुलीच्या वहिनीने तिच्या भावाला सांगितले की, तुझ्या बहिणीचे कुठेतरी अफेअर आहे आणि हा रक्तस्त्राव शारीरिक संबंधामुळे झाला आहे.
हे ऐकून मुलीचा मोठा भाऊ संतापला आणि त्याने बहिणीवर ३ दिवस सतत मारझोड करीत राहिला. तिला लाथा-बुक्क्यांनी मारहाण करायचा. या मारहाणीमुळे मुलीला गंभीर दुखापत झाली, त्यामुळे दुर्दैवाने 12 वर्षीय मुलीचा मृत्यू झाला. यानंतर भावाने स्वत: मुलीला मध्यवर्ती जिल्हा रुग्णालयात नेले, तेथे डॉक्टरांनी तिला मृत घोषित केले.
मात्र शवविच्छेदन केले असता त्याच्या चेहऱ्यावर, मानेवर, पाठीवर थाप आणि मारहाणीच्या खुणा आढळून आल्या. यानंतर डॉक्टरांनी पोलिसांना माहिती दिली. माहिती मिळताच पोलिसांनी घटनास्थळ गाठून या निर्दयी भावाविरुद्ध खुनाचा गुन्हा दाखल करून त्याला अटक केली.
