बारामती लोकसभा मतदारसंघातील खडकवासला विभागात एका मतदान केंद्रात इलेक्ट्रॉनिक मतदान यंत्राची (ईव्हीएम) पूजा केल्याप्रकरणी महाराष्ट्र महिला आयोगाच्या अध्यक्षा रुपाली चाकणकर आणि इतर सात जणांविरुद्ध गुन्हा दाखल करण्यात आला आहे. रुपाली चाकणकर ह्या अजित पवार गटाच्या राष्ट्रवादी काँग्रेस पक्षाच्या नेत्या आहेत.
“चाकणकर आणि इतरांनी आज (मंगळवारी) सकाळी सिंहगड रोड परिसरात असलेल्या मतदान केंद्राच्या अधिकाऱ्याच्या आदेशाची अवज्ञा केली, आत जाऊन ‘ईव्हीएम’ची पूजा केली,” असे एका पोलिस अधिकाऱ्याने सांगितले.
निवडणूक आयोगाच्या अधिकाऱ्याने दाखल केलेल्या तक्रारीच्या आधारे लोकप्रतिनिधी कायदा 1951 च्या कलम 131 (मतदान केंद्रांवर किंवा त्याजवळील उच्छृंखल वर्तनासाठी दंड) आणि 132 (मतदान केंद्रावरील गैरवर्तनासाठी दंड) अंतर्गत गुन्हा दाखल करण्यात आला आहे.
चाकणकर हे राज्याचे उपमुख्यमंत्री अजित पवार यांच्या नेतृत्वाखालील राष्ट्रवादीचे आहेत, तर इतर सात जणांमध्ये राष्ट्रवादी (शरद पवार गट) आणि शिवसेना-उद्धव बाळासाहेब ठाकरे (शिवसेना-यूबीटी) गटा तील प्रत्येकी एका सदस्याचा समावेश आहे.
