Kargil Vijay Diwas : भारत आणि पाकिस्तानमध्ये फाळणी झाल्यापासून सीमेवर संघर्ष सुरू आहे. एलओसीवर दररोज गोळीबार होत आहे. दोन्ही देशांचे सैन्य काश्मीरसाठी संघर्ष करत आहे. हा संघर्ष आजचा नाही, याआधीही भारत आणि पाकिस्तानमध्ये युद्ध झाले आहे.
1999 च्या कारगिल युद्धात भारत आणि पाकिस्तान एकमेकांसमोर होते आणि भारतीय शूर सैनिकांनी कारगिलची उंच शिखरे पाकिस्तानच्या ताब्यातून मुक्त केली होती. या युद्धात अनेक जवान शहीद झाले, तरीही कारगिल युद्धात भारताला विजय मिळाला. भारताचा दैदिप्यमान विजय आणि भारतीय जवानांचे हौतात्म्य इतिहासाच्या पानात कायमचे नोंदले गेले. कारगिलच्या विजयाची आणि हुतात्म्यांच्या बलिदानाची आठवण म्हणून दरवर्षी २६ जुलै हा दिवस कारगिल विजय दिवस म्हणून साजरा केला जातो.
26 जुलै 1999 हा दिवस कारगिल विजय दिवस म्हणून का साजरा केला जातो, जाणून घ्या या दिवसाचा इतिहास काय आहे जो प्रत्येक भारतीयासाठी अभिमानाचा दिवस ठरला.
फाळणीनंतरही दोन्ही देशांमधील संघर्ष सुरूच होता. परिणामी १९७१ मध्ये भारत-पाक युद्ध झाले. मात्र, त्यानंतरही दोन्ही देशांमध्ये सशस्त्र युद्धे झाली. भारत आणि पाकिस्तानने फेब्रुवारी 1999 मध्ये काश्मीरवर सुरू असलेला वाद कमी करण्यासाठी शांततापूर्ण तोडगा काढण्याचे आश्वासन दिले. पण नियंत्रण रेषा ओलांडून भारतीय हद्दीत पाकिस्तानी घुसखोरी सुरूच होती.
1999 मध्ये भारत आणि पाकिस्तान यांच्यातील सीमा विवादामुळे कारगिल युद्ध सुरू झाले. पाकिस्तानी सैन्याने भारतीय हद्दीतील कारगिलची उंच शिखरे काबीज केली, त्याला प्रत्युत्तर म्हणून भारतीय सैन्याने ‘ऑपरेशन विजय’ केले.
भारताच्या शूर सैनिकांनी पाकिस्तानी घुसखोरांचा पाठलाग करत टायगर हिल आणि इतर चौक्यांवर कब्जा केला. कारगिल, लडाखमध्ये भारत आणि पाकिस्तानमधील हे युद्ध 60 दिवसांपेक्षा जास्त काळ चालले. या युद्धात भारताचे २ लाख सैनिक सहभागी झाले होते.
सैन्याचे मिशन यशस्वी करण्यासाठी अनेक शूर सुपुत्रांनी आपल्या प्राणांची आहुती दिली, त्यापैकी एक कॅप्टन विक्रम बत्रा. 26 जुलै 1999 रोजी भारतीय सैन्याने युद्धात विजय घोषित केला. कारगिल युद्धात भारतीय लष्कराच्या ५२७ जवानांच्या हौतात्म्यासोबतच पाकिस्तानचे ३५७ जवानही ठार झाले होते.
