शाहरुख खानच्या ‘पठाण’ चित्रपटातील ‘बेशरम रंग’ या गाण्यावरून सुरू असलेला वाद थांबण्याचे नाव घेत नाहीये. ‘बेशरम रंग’मधील दीपिका पदुकोणच्या बिकिनीमुळे भारतात प्रचंड विरोध झाला, त्यानंतर सेन्सॉर बोर्डाने निर्मात्यांना काही बदल करण्याचा सल्ला दिला आहे. आता तर पाकिस्तानचा गायक सज्जाद अलीनेही यावर खिल्ली उडवली आहे. अशा परिस्थितीत पुन्हा एकदा ‘बेशरम रंग’ वादात सापडला आहे.
पाकिस्तानी गायक सज्जाद अलीने नाव न घेता ‘बेशरम रंग’वर निशाणा साधला आहे. ‘बेशरम रंग’ हे त्याच्या ‘अब के हम बिछडे’ या जुन्या गाण्यासारखेच असल्याचे तो म्हणतो. खरं तर, सज्जाद अलीने त्याच्या इंस्टाग्राम अकाउंटवर एक व्हिडिओ शेअर केला आहे. या व्हिडीओमध्ये तो म्हणतोय की त्याने आगामी चित्रपटातील एक गाणे ऐकले, ज्यावरून त्याला त्याने वर्षांपूर्वी लिहिलेल्या गाण्याची आठवण झाली.
व्हिडिओमध्ये सज्जाद अलीने नाव घेतलेले नाही पण सोशल मीडिया यूजर्सचा असा विश्वास आहे की तो ‘पठाण’मधील ‘बेशरम रंग’ या गाण्याचा संदर्भ देत आहे. युजर्स कमेंट करून आपली प्रतिक्रियाही देत आहेत. एकाने लिहिले, ‘बेशरम रंग सज्जाद अलीच्या संगीत संयोजनावर आधारित आहे. भारतातील लोक पाकिस्तानी गाणी चोरतात आणि त्यांना श्रेयही देत नाहीत. त्याचवेळी दुसऱ्याने लिहिले की, ‘हे बेशरम रंगासारखे दिसते आहे.’ याशिवाय काही लोकांचे म्हणणे आहे की दोन्ही गाणी पूर्णपणे वेगळी आहेत आणि ‘बेशरम रंग’ ही त्याची कॉपी नाही.
शाहरुख खानचा ‘पठाण’ चित्रपट 25 जानेवारीला थिएटरमध्ये दाखल होणार आहे. या चित्रपटात शाहरुखसोबत दीपिका पदुकोण आणि जॉन अब्राहम देखील दिसणार आहेत. चित्रपटाचे पहिले गाणे ‘बेशरम रंग’ रिलीज झाल्यापासून हा चित्रपट वादात सापडला आहे. एकीकडे गाण्यावर चोरीचे आरोप होत आहेत, तर दुसरीकडे दीपिकाने गाण्यात घातलेल्या बिकिनीच्या भगव्या रंगाचा निषेध होत आहे.
