Mobile Phone – ऑनलाइन फसवणूक ही एक मोठी समस्या आहे. बनावट सिमचे जाळे भारतात मोठ्या प्रमाणावर पसरले आहे. म्हणजे, लोक बनावट कागदपत्रांसह सिमकार्ड घेतात, त्यानंतर या सिमकार्डचा वापर करून ऑनलाइन फसवणूक केली जाते. अशा परिस्थितीत फसवणूक करणाऱ्यांना ओळखणे आणि पकडणे कठीण होऊन जाते. मात्र, आता सरकारने मोठी कारवाई करत 55 लाख मोबाईल फोन कनेक्शन बंद केले आहेत.
भारत सरकारने संचार साथी पोर्टलवरून बनावट कागदपत्रांवर मिळवलेली सिमकार्डे ओळखली आहेत. सायबर गुन्हे आणि ऑनलाइन फसवणूक रोखण्याच्या उद्देशाने हे पोर्टल तयार करण्यात आले आहे. संचार साथी पोर्टलवरून, तुम्ही तुमचे आधार, मतदार ओळखपत्र किंवा इतर कागदपत्रांच्या मदतीने इतर कोणी सिम कार्ड खरेदी केले आहे की नाही हे तुम्ही स्वतः शोधू शकता. तसेच तुम्ही अशा मोबाईल क्रमांकावर तक्रार करू शकता.
संसदेत माहिती देताना संचार मंत्री देवुसिंह चौहान म्हणाले की, बनावट ओळखपत्रांद्वारे मिळवलेले ५५ लाख मोबाईल क्रमांक बंद झाल्याचे तपासात आढळून आले आहे.
यासोबतच सरकारने सायबर गुन्हे आणि आर्थिक फसवणुकीत गुंतलेले १.३२ लाख हँडसेट ब्लॉक केले आहेत, तर लोकांच्या तक्रारी आल्यानंतर १३.४२ लाख कनेक्शन ब्लॉक करण्यात आल्याचे सांगण्यात आले. बनावट कागदपत्रांचा वापर करून बनवलेल्या सिमकार्डचा वापर करून आर्थिक फसवणूक, फिशिंग कॉल यांसारख्या गुन्हेगारी कारवाया मोठ्या प्रमाणात केल्या जात आहेत.
संचार साथी पोर्टल म्हणजे काय?
संचार साथी पोर्टल हे युजरच्या मोबाईल नंबरची पडताळणी करण्यासाठी एक ऑनलाइन प्लॅटफॉर्म आहे. संचार साथी पोर्टल वापरकर्त्यांना त्यांच्या नावाने जारी केलेले मोबाइल कनेक्शन जाणून घेण्यास, अनावश्यक कनेक्शन डिस्कनेक्ट करण्यास, हरवलेले मोबाइल फोन ब्लॉक आणि ट्रेस करण्यास आणि नवीन आणि जुने मोबाइल फोन खरेदी करताना डिव्हाइसची वास्तविकता तपासण्यास सक्षम करते.
