Legends League Cricket : लिजेंड्स लीग क्रिकेटचा एलिमिनेटर सामना इंडिया कॅपिटल्स आणि गुजरात जायंट्स यांच्यात खेळला गेला. सुरत येथील लालभाई कॉन्ट्रॅक्टर स्टेडियमवर झालेल्या या सामन्यात इंडिया कॅपिटल्सने प्रथम फलंदाजी करताना 20 षटकांत 7 गडी गमावून 223 धावा केल्या. प्रत्युत्तरात गुजरात जायंट्सला 7 गडी गमावून केवळ 211 धावा करता आल्या आणि सामना गमावला.
या सामन्यात गुजरात जायंट्सचा गोलंदाज एस श्रीशांत आणि इंडिया कॅपिटल्सचा कर्णधार गौतम गंभीर यांच्यात बाचाबाची झाली. याआधी समोर आलेल्या व्हिडीओमध्ये दोन्ही खेळाडूंमध्ये हे प्रकरण नंतर मिटल्याचे दिसले होते, मात्र आता असाच आणखी एक व्हिडिओ समोर आला आहे. नवीन व्हिडिओमध्ये, गौतम गंभीर आणि श्रीशांत यांच्यात जोरदार वादावादी पाहायला मिळते आणि त्यादरम्यान पंचानी मध्यस्ती करून दोन्ही खेळाडूंना वेगळे केल्याचे दिसत आहेत.
गुजरात जायंट्सने नाणेफेक जिंकून प्रथम फलंदाजी करण्याचा निर्णय घेतला. गौतम गंभीर सामन्याच्या सुरुवातीपासूनच चांगला खेळताना दिसत होता. एस श्रीशांत सामन्याचे दुसरे षटक टाकायला आला होता आणि गौतम गंभीरने त्याच्या षटकाच्या पहिल्याच चेंडूवर षटकार ठोकला.
यानंतर श्रीशांतच्या पुढच्याच चेंडूवर गंभीरने चौकार ठोकला. पुढील दोन चेंडू ठिपके होते, त्यानंतर दोन्ही खेळाडू एकमेकांना काहीतरी म्हणाले. मात्र, दोघांनी काय बोलले हे स्पष्ट झालेले नाही. यानंतर प्रकरण शांत झाल्याचे दिसत होते, परंतु षटकांच्या मध्यभागी दोन्ही खेळाडू पुन्हा भांडताना दिसले. गंभीर आणि श्रीशांतचा हा व्हिडिओ आता समोर आला आहे. यादरम्यान मैदानावरील पंचांनी दोन्ही खेळाडूंमध्ये मध्यस्थी केली.
Heated conversation between Gautam Gambhir and S Sreesanth in the LLC. pic.twitter.com/Cjl99SWAWK
— Mufaddal Vohra (@mufaddal_vohra) December 7, 2023
सामन्यानंतर श्रीशांतने इंस्टाग्राम लाइव्ह व्हिडिओमध्ये सांगितले की, “येथे माझी कोणतीही चूक नाही. मला फक्त परिस्थिती स्पष्ट करायची होती. लवकरच किंवा नंतर तुम्हाला श्री गौतीने काय केले हे समजेल. तो शब्द मी. वापरलेले आणि मी मैदानावर सांगितलेल्या गोष्टी मान्य नाहीत.
माझे कुटुंब, माझे राज्य, सर्वांचे खूप नुकसान झाले आहे. तुमच्या सर्वांच्या पाठिंब्याने मी ती लढाई लढली आहे. आता लोकांना विनाकारण माझा अपमान करायचा आहे. होय. त्याने ज्या गोष्टी बोलल्या नाही पाहिजे त्या बोलल्या. तो काय म्हणाला ते मी तुम्हाला नक्कीच सांगेन.”
सामन्याबद्दल बोलायचे झाले तर, गौतम गंभीरच्या 30 चेंडूत 51 धावांच्या खेळीच्या जोरावर इंडिया कॅपिटल्सने 20 षटकांत 7 गडी गमावून 223 धावा केल्या आणि गुजरात जायंट्सला विजयासाठी 224 धावांचे लक्ष्य दिले. प्रत्युत्तरात ख्रिस गेलने 84 धावांची खेळी खेळली, पण संघाला विजयाची नोंद करता आली नाही. गुजरात जायंट्सला 20 षटकात 7 गडी गमावून केवळ 211 धावा करता आल्या आणि सामना 12 धावांनी गमवावा लागला.
