न्यूज डेस्क : उद्या 30 सप्टेंबर 2000 रुपयांच्या नोटा बदलण्याची अंतिम तारीख आहे. परंतु अद्याप 24,000 कोटी रुपयांच्या 2000 रुपयांच्या नोटा बँकिंग प्रणालीमध्ये परत आलेल्या नाहीत. अशा परिस्थितीत रिझर्व्ह बँक 2000 रुपयांच्या नोटा परत करण्याची मुदत आणखी वाढवणार का?, असा प्रश्न उपस्थित होत आहे. मनी कंट्रोलच्या अहवालानुसार, आरबीआय 2000 रुपयांच्या नोटा बदलण्याची मुदत 31 ऑक्टोबरपर्यंत वाढवू शकते. सूत्रांकडून माहितीनुसार, आरबीआय मुदत वाढविण्याचा विचार करत आहे.
सूत्रांकडून मिळालेल्या माहितीनुसार, मुदत वाढवण्यामागे अनेक कारणे आहेत, पण त्यातील एक प्रमुख कारण म्हणजे अनेक भारतीय परदेशात राहतात. अशा परिस्थितीत, या अनिवासी भारतीयांना आणखी एक महिन्याचा कालावधी मिळेल, ज्याद्वारे ते 2000 रुपयांच्या नोटा सहज बँकांमध्ये जमा करू शकतील.
किती नोटा परत आल्या?
रिझर्व्ह बँक ऑफ इंडियाने 19 मे 2023 रोजी 2000 रुपयांच्या नोटा काढण्याची घोषणा केली होती. सेंट्रल बँकेच्या म्हणण्यानुसार, 31 मार्च 2023 पर्यंत, 3.62 लाख कोटी रुपयांच्या एकूण 2000 रुपयांच्या नोटा चलनात होत्या, ज्या 19 मे पर्यंत 3.56 लाख कोटी रुपयांवर आल्या. 1 सप्टेंबर 2023 रोजी जाहीर झालेल्या आकडेवारीनुसार, 3.32 लाख कोटी रुपयांच्या 2000 रुपयांच्या नोटा बँकिंग प्रणालीत परत आल्या होत्या. अशा स्थितीत सप्टेंबर महिन्याच्या सुरुवातीपर्यंत एकूण ९३ टक्के नोटा बँकिंग व्यवस्थेत दाखल झाल्या आहेत. त्यानंतरही सुमारे २४ हजार कोटी रुपयांच्या नोटा शिल्लक आहेत.
RBI ला 100% चलनी नोटा परत करायच्या आहेत
तज्ज्ञांच्या मते, रिझर्व्ह बँक 2000 रुपयांच्या 100 टक्के नोटा बँकिंग व्यवस्थेत परत आणण्याचा प्रयत्न करत आहे. यासाठी बँक 2000 रुपयांच्या नोटा काढण्याची मुदत वाढवू शकते. यामुळे परदेशात राहणाऱ्या लोकांना थोडा वेळ मिळेल आणि ते 2000 रुपयांच्या नोटा बँकिंग व्यवस्थेत परत करू शकतील.
2000 च्या नोटा परत कशा करायच्या
तुमच्याकडेही 2000 रुपयांच्या जुन्या नोटा असतील तर त्या आजच परत करा. यासाठी तुम्ही तुमच्या बँक किंवा पोस्ट ऑफिसमध्ये जा. तिथे जाऊन एक फॉर्म भरा. लक्षात ठेवा की एका वेळी फक्त 20,000 रुपये परत केले जाऊ शकतात. फॉर्म सबमिट करा आणि त्यानंतर त्या रकमेइतकी रक्कम तुमच्या खात्यात जमा केली जाईल.
