‘द केरल स्टोरी’ चित्रपटावरून वाद संपत नाही तोच दुसऱ्या वादाला तोंड फुटलं आहे, ‘द क्रिएटर सृजनहार’ या चित्रपटाला विरोध सुरू झाला आहे. या चित्रपटाच्या माध्यमातून लव्ह जिहादचा प्रचार केला जात असल्याचा आरोप केला जात आहे, त्यामुळे बुधवारी गुजरातमधील अहमदाबादमध्ये या चित्रपटाच्या प्रदर्शनाविरोधात घोषणाबाजी आणि गोंधळ झाला.
क्रिएटर सृजनहार हा चित्रपट २६ मे रोजी प्रदर्शित होणार आहे, मात्र तो रिलीज होण्यापूर्वीच हा चित्रपट वादाच्या भोवऱ्यात सापडला आहे. हिंदूत्ववादी संघटना बजरंग दल या चित्रपटाला विरोध करत आहे. चित्रपटात लव्ह जिहादचा प्रचार करण्यात आल्याचा आरोप बजरंग दलाने केला आहे. गुजरातमधील अहमदाबादमधील मल्टिप्लेक्समध्ये बुधवारी बजरंग दलाच्या सदस्यांनी चित्रपटाविरोधात निदर्शने केली. बजरंग दलाच्या सदस्यांनी चित्रपटाच्या प्रदर्शनाला स्थगिती देण्याची मागणी केली.
या वादावर निर्मात्याने स्पष्टीकरण दिले
दुसरीकडे, चित्रपटाच्या विरोधावर चित्रपटाचे निर्माते राजेश कराटे गुरुजी म्हणाले की, ‘जग बदलू शकते हे आम्ही चित्रपटात दाखवण्याचा प्रयत्न केला आहे. मी कोणत्याही धमक्यांना घाबरत नाही, त्यांना त्यांचा धर्म आवडतो आणि मी त्याबद्दल काहीही करू शकत नाही. मी सर्व धर्माच्या अनुयायांना आवाहन करतो की, धर्माच्या नावाखाली दंगली आणि हिंसाचार करू नका. धर्म वाचवण्याच्या नावाखाली माणसाला का मारायचे? धर्माची हत्या करण्यापेक्षा व्यक्तीला वाचवले पाहिजे. तुम्हाला तुमचे कुटुंब गमावायचे आहे का, असा सवाल त्यांनी केला.
क्रिएटर सृजनहरचे निर्माते राजेश कराटे गुरुजी आणि राजू पटेल आहेत. त्याचबरोबर या चित्रपटाचे लेखन आणि दिग्दर्शन प्रवीण हिंगोनिया यांनी केले आहे. हा चित्रपट 26 मे रोजी देशभरातील 250 हून अधिक सिनेमागृहांमध्ये प्रदर्शित होणार आहे. या चित्रपटात सीआयडी मालिका फेम दयानंद शेट्टी, मिर्झापूर वेब सीरिज फेम शाजी चौधरी आणि नवोदित जश्न कोहली प्रमुख भूमिकेत आहेत.
