Cyclone Michaung : बंगालच्या उपसागरात ‘मिचॉन्ग’ या चक्रीवादळामुळे तामिळनाडूच्या अनेक भागात मुसळधार पाऊस पडत आहे, त्यामुळे जनजीवन पूर्णपणे विस्कळीत झाले आहे. विशेषत: चेन्नईमध्ये या मुसळधार पावसामुळे अनेक ठिकाणी रस्ते जलमय झाले असून अनेक तास वीजपुरवठा खंडित झाला होता. मिचॉन्ग चक्रीवादळ सध्या बंगालच्या उपसागरात उग्र रूप धारण करत असून ते आंध्र किनारपट्टीकडे वेगाने सरकत आहे. हे चक्रीवादळ मंगळवारी दुपारी नेल्लोर आणि मछलीपट्टणम दरम्यान धडकण्याची शक्यता आहे.
या चक्रीवादळामुळे झालेल्या मुसळधार पावसाने तामिळनाडूमध्ये हाहाकार माजवला आहे. चेन्नई, चेंगलपट्टू, कांचीपुरम, नागापट्टिनम, कुड्डालोर आणि तिरुवल्लूर जिल्ह्यात जोरदार पाऊस झाला आहे. त्यामुळे चेन्नईतील बहुतांश भाग पाण्यात बुडाला आहे, तर सखल भागात मोठ्या प्रमाणात पूरस्थिती निर्माण झाली आहे.
काही भागात तर रस्त्यांवर असा पूर आला होता, त्यात गाड्याही तरंगताना दिसत होत्या. शहरातील बर्‍याच भागांना वीज कट आणि इंटरनेट व्यत्ययांचाही सामना करावा लागला, ज्यामुळे लोकांना सुरक्षित राहण्याचे मार्ग शोधण्यास भाग पाडले.
दरम्यान, सोशल मीडियावर एक व्हिडिओ मोठ्या प्रमाणात व्हायरल होत असून, त्यामुळे लोकांमध्ये घबराट पसरली आहे. यामध्ये रात्रीच्या वेळी शहरातील रस्त्यांवर मगरी फिरताना दिसत आहे. हा सरपटणारा प्राणी चेन्नईच्या पेरुंगलथूर भागात आढळून आला होता. या व्हिडिओमध्ये ही मगर रस्त्यावर रेंगाळताना दिसत आहे आणि नंतर झुडपात दिसेनाशी झाली आहे.
दुसरीकडे या मुसळधार पावसामुळे रेल्वे आणि हवाई सेवेवरही मोठा परिणाम झाला आहे. अनेक उड्डाणे आणि गाड्या रद्द कराव्या लागल्या किंवा त्यांचे मार्ग बदलले. चेन्नई विमानतळाचे कामकाज सकाळी 9.40 ते 11.40 पर्यंत बंद ठेवण्यात आले होते. सततच्या पावसामुळे विमानतळावर येणारी आणि जाणारी सुमारे ७० उड्डाणे रद्द करण्यात आली. धावपट्टी आणि डांबरी मार्गही बंद असल्याचे सूत्रांनी सांगितले.
— Prashanth Rangaswamy (@itisprashanth) December 4, 2023
