मुंबई : रिझर्व्ह बँकेने पुन्हा एकदा बँकेचा परवाना रद्द केला आहे. मुंबईच्या ‘द कपोल को-ऑपरेटिव्ह बँक लिमिटेड’चा परवाना रद्द केला आहे. या बँकेत खाते असलेल्या ग्राहकांना अडचणींचा सामना करावा लागू शकतो. मध्यवर्ती बँकेने म्हटले आहे की बँकेकडे पुरेसे भांडवल नाही आणि कमाईची क्षमता नाही, यामुळे आरबीआयने हा निर्णय घेतला आहे. या निर्णयानंतर सुमारे 42 हजार खातेदारांच्या 150 कोटींहून अधिक रकमेच्या ठेवी अडकल्या आहेत. खातेदारांना धक्का बसला असून, वर्षानुवर्षे काम करणाऱ्या कर्मचाऱ्यांचे भवितव्यही धोक्यात आले आहे.
भारतीय रिझर्व्ह बँकेने एका निवेदनात म्हटले आहे की, परवाना रद्द केल्यामुळे, सहकारी बँकेला बँकिंग व्यवसायावर तात्काळ बंदी घालण्यात आली आहे, ज्यामध्ये ठेवी स्वीकारणे आणि ठेवी परत करणे समाविष्ट आहे.
ग्राहकांना 5 लाख रुपये मिळतील…
रिझर्व्ह बँकेने म्हटले आहे की प्रत्येक ठेवीदाराला ठेव विमा आणि क्रेडिट गॅरंटी कॉर्पोरेशन (DICGC) कडून 5 लाख रुपयांपर्यंतच्या ठेव विमा दाव्याची रक्कम मिळण्याचा अधिकार असेल. अशा प्रकारे, बँकेच्या सुमारे 96.09 टक्के ठेवीदारांना त्यांची संपूर्ण ठेव रक्कम DICGC कडून मिळण्याचा अधिकार असेल.
